中國3D數碼（8078）主席蕭定一輸咗畀英皇老闆楊受成喎！講緊係佢哋兩位阿哥，見到中環娛樂行間HMV上半年搬走，竟然一齊對呢個大舖感到好有興趣，無獨有偶，兩位都諗住租落嚟做戲院，聞說，業主就屬意將個舖租畀楊受成。
中國3D數碼同英皇電影近年製作發行好多電影，前者最出名係《3D肉蒲團》，英皇就有唔少由謝霆鋒同阿Sa做主角嘅電影。兩間公司家陣喺內地多個地方都有經營戲院，香港就未有，早排蕭定一自爆計劃今年喺香港旺區開戲院，其中就係傾緊中環HMV租開呢個舖。
傳月租150萬
聽講娛樂行業主已經有心水，屬意將3、4樓呢兩層巨舖租畀英皇，市場傳聞月租大約150萬元，以兩層總共1.25萬平方呎計算，呎租120元屬於好價，高過之前HMV月租125萬元。
聞說如果真係由英皇租落做戲院，呢度未必淨係賣戲飛、爆谷汽水咁普通，可能有間特色餐廳。聽業內口痕友講，以呢度兩層過萬呎計，應該可以劃出3至5個院，但如果加入餐廳元素又另作別論，話唔定可以劃一個院專門被人包場。老實講，交得過百萬租，喺中環開戲院，點都應該有多啲特色先得，唔係點計掂條數。以後除咗ifc，中環睇戲亦多個選擇。