邵音音同馮寶寶噚晚出席電影《媽咪俠》謝票活動，寶寶姐表示以佢所知，噚晚有人包場睇戲：「係一位老朋友，快將90歲，帶咗一班耍太極朋友包場睇戲，令我好感動，嗰位太太咁嘅歲數，都嚟欣賞我電影。」問到係咪好少出嚟謝票？寶寶姐表示：「都係跟音音姐出嚟，佢話好好玩。」
兩人對電影票房感到滿意，寶寶姐謂：「自己從來唔理呢樣嘢，高先生叫得我返嚟，都唔係話要保證呢樣嘢，我只係做到佢哋理想中好就得喇。」
由於囝囝係電影副導演，咁囝囝係咪特別緊張？寶寶姐表示：「佢三日前WhatsApp恭喜我，仲問我係咪好緊張？」咁會否同兒子分享喜訊，佢好緊張咁話：「唔好講係囝囝，係副導演。」
咁係咪同副導演謝票？佢話：「唔會喇，副導演處於幕後，冇理由要走出嚟。我年紀觀眾唔係後生仔，我啲觀眾唔係好識上網，搵唔到乜嘢戲院睇，噚日喺戲院見到位觀眾，佢話喺香港區行咗好多院線，見唔到套戲，過咗九龍去到旺角見到有得上，入去捧場，觀眾好有我心。」
新聞來源 蘋果日報
